MALIA OS RECORTES ORZAMENTARIOS
Arzúa aposta un ano máis
pola maior feira ecolóxica de Galicia
Os días 17 e 18 de novembro celebrarase en Arzúa unha nova
edición da maior feira ecolóxica de Galicia. A pesar de non contar, por
primeira vez, co financiamento da Deputación da Coruña, o Concello decidiu
continuar co evento. Así, os produtos naturais, os máis innovadores, as
terapias alternativas e as produtoras e produtores locais -das feiras do 8 e
22- encherán o Recinto Feiral Terra do Queixo.
As solicitudes para contar cun stand na IX edición da Feira
Ecolóxica de Arzúa superaron en poucos días o límite de espazo físico do
Recinto Feiral Terra do Queixo, o que asegura o “éxito” do evento, afirma o
responsable de Culturactiva SCG, empresa xestora da Feira, Manuel Vicente. O
público que asista terá ao seu dispór máis de trinta postos de diversos
produtos e servizos naturais.
Malia a non contar co financiamento da Deputación da Coruña,
este proxecto rexurde sen deixar de atender as tendencias actuais de consumo e
produción. Deste xeito, a Feira ecolóxica de Arzúa contará por vez primeira
cunha cervexa artesá entre os produtos expostos, ademais das catas e
demostracións da elaboración doutros coma o queixo de cabra e, como en
anteirores ocasións, tamén queixo de Arzúa ou o mel.
De novo, Arzúa será a capital galega da ecoloxía na terceira
fin de semana de novembro. Punto de encontro de artesáns, consumidores,
produtores e público, a Feira Ecolóxica arzuá converterase un ano máis no
viveiro das últimas novidades e xeitos de vivir de forma máis respectuosa coa
contorna e cos seus habitantes.
Deste xeito, unha ampla sección de alimentación ofrecerá
produtos de apicultura, panadería-repostería ou o queixo, entre outros. Tamén
estará presente o agro, a crianza natural, o comercio xusto, as plantas
medicinais e aromaticas, a cosmética natural, e as bebidas, por só nomear
algúns dos produtos e servizos dos que poder aprender e gozar na meirande feira
ecolóxica de Galicia.
No hay comentarios:
Publicar un comentario